mundartforum – Dialekt venetze

Wer?

Au wemmer nöd gliich reded, so rede mer doch all vom Gliiche. – Di schwizer­dütsch Mundart isch charakteristisch für üsi Kultur, sie isch vilfältig, und sie isch lebendig. Mer vom mundart­forum setzed üüs defür ii, Kenntniss und Gebruuch vo schwizerdütsche Dialekt ufzzeige.

Wa?

Die Web-Plattform venetzt Mundart­schaffendi und Mundartinteressierti, sig’s us em Bereich Forschig/Wüsseschaft, us Kulturkreis oder us de breite Bevölkerig. Mer möch­ted, dass jede und jedi vo Chur über Appezell, Lu­zern und Bern bis uf Zermatt und über d’Grenze uus sini Mundart lebt und d‘Freud dra wiitertreit.

Wie?

D‘Website...

… venetzt. Und zwor Mundartschaffendi und Mundart­interessierti us Kultur, Wüsseschaft und Bevölkerig.
… teilt Wüsse. Und zwor als Sammel- und Aalaufstell i Sache Mundart.
… informiert. Und zwor im Sinn von ere Informationszent­rale und -treischiibe über gsellschaftlichi Entwick­lige im Bereich Schwizerdütsch.
… isch aktuell. Und zwor im Sinn von ere Agenda und eme Kiosk, wo Veaastaltige, Publikatione etc. teilt werde chönd. 

Und siged Sie vesichered: Uf de Web-Plattform isch immer öpis los. Es wird gredt, glese, glueged und glosed – so lebt üsi Mundart.

Sie!

Mer vo de Projektgruppe sind überzüügt, mit dem Aagebot en attraktive Biitrag zu de Vilfalt vo üsne Mundarte z‘leischte. Für d’Umsetzig vo de Web-Plattform bruuche mer Gliichgsinnti und Gönner. Also, mached au Sie mit! Ideell, finanziell, tatchräftig. Stönd Sie mit Ehrem Name för üses Projekt ii, spended Sie en grössere oder chlinere Batze oder engagiered Sie sich aktiv im Verein oder i der Projektgruppe – mer sind dankbar för jedi Art vo Understützig. Und seged: Tanke!

Kontakt

info@mundartforum.ch