Dialektologii a Schwiizer Universitäte

S wüsseschaftliche Stuudium vo de schwiizerdüütsche Dialäkt wird ide Schwiiz a verschidene Hoochschuele und wiitere Forschigsstele betribe.

Am düütsche Seminaar vo de Universitäät Züri forscht mer am Leerstuel vo de Prof. Dr. E. Glaser zur Dialäktologii. Under anderem entstaat deet sit em Jaar 2000 de syntaktischi Atlas vo de schwiizerdüütsche Dialäkt. In Zämenaarbet mit wiitere Fachpersoone us de Spraachwüsseschaft isch de chliini Spraachatlas vo de düütsche Schwiiz gschribe worde. Au am Phonogrammarchiv vo de Universität Züri beschäftigt mer sich mit de schwiizerdüütsche Dialäkt. Mer hät deet under anderem s Buech/CD-Projäkt “Stimmen der Schweiz” usegää.

Am düütsche Seminaar vo de Universitäät Basel wird im Bereich düütschi Spraachwüsseschaft au Dialäktologii betribe. Entstande sind deet under anderem s noie Baseldüütsch Wörterbuech (2010) und s Variantewörterbuech (2004; e Noiuflaag isch in Bearbeitig).

Am Institut für Germanistik vo de Universitäät Bern häts früener e Profesuur für Dialäktologii und Volkskund gää, die isch aber vor es paar Jaar abgschafft worde. Mit Dialäktologii beschäftiged sich no einzelni MitarbeiterInne i de Abteilig Düütschi Spraachwüsseschaft und bi de Forschigsstell für Namekund.

A de Universitäät Friburg i. Üe. wird am Leerstuel vo de Prof. Dr. Helen Christen zur schwiizerdüütsche Dialäktologii gforscht. En Forschigsschwäärpunkt a däm Leerstuel isch s Näbetenand vo Dialäkt und Hochdüütsch i de Schwiiz.

Es dialäktologischs Groosprojekt isch s Schwiizerische Idiotikon, wo in Züri dihei isch. Es dokumentiert di düütschi Spraach i de Schwiiz vom Spaatmittelalter bis is 21. Jarhundert. De Trääger vom Institut isch de «Verein für das Schweizerdeutsche Wörterbuch», de Chefredaktor isch de Hans-Peter Schifferle. Im Momänt wird am Band 17 (vo 17) gschaffet.

Mit de Dialäktologii äng verflochte sind usserdem di verschidene namekundliche Projäkt, vor allem di kantonaale Ortsnamebüecher (z.B. s Basler, Solothurner, Thurgauer, Berner Namebuech). Alles, wo sich loont z wüsse, mit Literatur und Links, isch gsammlet under de Adrässe ortsnamen.ch

Tegscht: L. Thöny, Jan. 2016